อากาศปีนี้ฮ้อนอีหลี น้ำในแม่น้ำลำคลอง หนองบึงแห้งขอด โขง ชี มูล กะบ่เว้นคือกัน หลายๆ บ่อนบ่ต้องใช้เฮือพายแม่นหย่างข้วมได้โลด ซ่อยๆ กันเด้อพี่น้อง ใช้น้ำให้ประหยัด ให้ม้มแล้งปีนี้จักฝนสิมาไวบ่ คันแม่นยามสงกรานต์ปีนี้กะเอาพอปะพรมกันให้ซุ่มเย็นกะพอ อย่าสิสาดใส่กันหลายมันเปลืองน้ำ เฮาหันกลับมาอนุรักษ์วัฒนธรรมพื้นบ้านดั้งเดิมเฮาเบิ่งแหน่

ในสมัยรุ่นพ่อแม่ย้อนไปหาปู่สังกะสาย่าสังกะสีพุ้น ยามสงกรานต์เพิ่นสิพากันไปสรงน้ำพระพุทธรูปกัน ถ้ามีพระสงฆ์องค์ใดอยู่ในร่มกาสาวพัตร์ ประพฤติดี ปฏิบัติชอบ มีผู้คนยกย่องสรรเสริญเป็นผู้ที่ครองธรรม ชาวบ้านกะสิพากันตั้งกองหด (รดน้ำ) พระสงฆ์ผู้เจริญนั่น (อ่านเพิ่มเติมเรื่องนี้) หลังพิธีการก็จะมีการรดน้ำขอพรผู้ใหญ่ในหมู่บ้าน ต่อจากนั้นกะสิเป็นการละเล่นของหนุ่มสาว ในการรดน้ำขอความฮักแพงกัน บ่ได้สาดน้ำเอาเป็นเอาตายแบบสมัยนี้ดอก จักแม่นหยัง… ฮ้ายกว่าสงคราม นอกจากความรุนแรงในการสาดน้ำแล้ว สมัยนี้ยังลวนลามล่วงเกิน ฉวยโอกาส กระทำย่ำยีต่อผู้อ่อนแอกว่า นี่มันบ่แม่นวัฒนธรรมของคนโบฮาณดอก ควรสิเลิกกันได้แล้ว

หันมาทางบ้านเมือง เวลานี้กะจั่งแม่นเถียงกัน ใส่เสื้อคนละสีกะผิดกัน เป็นหยังจั่งบ่ใช้สติ ฟัง คิด ก่อนตัดสินใจ เฮ็ดอีหยังเพื่อไผ เคยเห็นอยู่บ่ โจรชี้หน้าโจร แล้วกะบอกว่ามึงนั่นแหละโจร โกงบ้านโกงเมือง ถามแหน่ นักการเมืองพรรคใด๋มันบ่โกง เพียงแต่ไผมันสิโกงแนบเนียนหรือหน้าด้านกว่ากันท่อนั่นหละ นี่กะบ่แม่นพวกเฮานี้บ้อเลือกพวกมันมา

ให้พากันถอยออกมายืนซอมเบิ่ง อย่าสิหย่างนำก้นเขาต้อยๆ ย้อนเงินร้อย เงินพัน เขาเอาของเหลือปาก น้ำย้อยล้นสิสบเขาดอกเอามาทานพวกเจ้า เขากินเหลือแล้วล่อให้พากันออกมากัดกันเอง เบิ่งแหน่พากันไปนอนตากแดดตากฝน ทนยุงกัดอยู่ในเมืองกรุง บาดพวกมันนายหน้าพากันไปนอนตากแอร์อยู่โรงแรมพุ้น จั่งแม่นคักหลาย… ลองเบิ่งหนังการ์ตูนเด็กน้อยแล้วคึดเบิ่งก่อนน่า…

เบิ่งแล้วลองใช้สติ ปัญญา พิจารณาเบิ่งสาก่อน อย่าสิฟ้าวไปฮ้อนนำเขาหลาย…. พี่น้อง!