ธันวาคม 16, 2017 | 4,631 views

ลาทีปีเก่า ๒๕๖๐

ายใจถิ่มไปอีกหนึ่งปี ผู้ลางคนสาบถสาบานว่าสิเฮ็ดนั่น เฮ็ดนี่ จนสิเบิดปีแล้วกะยังบ่ทันได้เฮ็ดอีหยัง อายเจ้าของบ่หน่อ เหอๆ บ่มีไผฮู้ บ่มีไผเห็น เทวดา นางฟ้า กะบ่ทวง แต่มันกะสิอยู่ในใจนี่หล่ะ ปีหน้า 2561 กะอย่าสิไปสาบถสาบานเพิ่มอีก ไปเฮ็ดอันเก่าให้มันแล้วก่อนน้อพี่น้อง อย่าสิถามว่า จ่มให้ไผ จ่มให้เจ้าของนี่หละ หึหึ…

ใกล้สิเบิดปี 2560 แล้ว ปี 2561 กะขอให้โชคให้หมาน ผ่านพ้นไปหม่อนๆ เด้อพี่น้องเอย อยู่ดีมีแฮงสู่ผู้สู่คน อย่าสิไปหวังแต่สิถืกลอตเตอรี่ 30 ล้านคือเผิ่นเด้อ มันสินอนบ่หลับย้านเขาลัก ญาติพี่น้องบ่เคยพ้อกันหลายปี เป็นสิบพุ้นละแหม่ กะสิมาทวงบุญคุณ มึงจำกูบ่ได้บ้อเคยอุ้มเคยป้อนเข้ามึงแต่น้อย พะนะ! กูละงึดคันบ่ถืกหวยรวยเบอร์ทุกข์ๆ นี่บ่มีพี่มีน้องน้อ…

ทวยบ่ได้ดอกว่าปีหน้าเศรษฐกิจสิดีสิฮ้าย ถ้าเฮาขยันขันแข็งทำมาหากินโดยสุจริต ยึดเอาคำพ่อ (รัชกาลที่ ๙) สอนไว้ อยู่อย่างพอเพียงบ่เกินโต มีเหลือให้เก็บออมไว้ใช้ยามข้างหน้า ปลูกผักพืชผลกินได้หลายๆ อย่าง เลี้ยงไก่ เลี้ยงปลา ให้พอได้เก็บกินอยู่ได้ครับ

ฅนอีสาน หรือคนภาคใด๋กะตาม ที่พากันทุกข์ยากแบบทิดหมูนี่ มักสิไปเชื่อคนง่ายๆ เขามาตั๋วมาล่อ มาเว้าให้ฟังว่า เฮ็ดจั่งซั้นจั่งซี่จั่งสิร่ำสิรวย กะพากันหูผึ่ง น้ำลายไหลโหยดๆ หลับตาฝันว่าสิมีนั่นมีนี่ ฝันหวานไป เลยส่อเขาไปว่า เฮ็ดจั่งใด๋ เขากะบอกว่า เอาเงินมาลงทุนท่อนั่นท่อนี้ สิมีดอกมีผลให้หลายกว่าเก่าในแต่ละเดือน กะว่ากันไป…

อย่าสิไปเชื่อมันเด้อพี่น้อง คันมันเฮ็ดได้อีหลีมันสิมาบอกเฮาเฮ็ดหยัง มันไปพาพ่อแม่พี่น้องมันเฮ็ดรวยไปโคตรตระกูลเดียวบ่ดีกว่าบ้อ มันกะคือกันกับพวกเฮาไปเฮ็ดบุญอยู่วัดแล้วถามหลวงพ่อว่า “งวดนี้โตใด๋ครับหลวงพ่อ” หลวงพ่อเลาเลยตอบมาว่า “โยมเอย ถ้าอาตมาฮู้ปานนั้น ไปซื้อเองแล้ว คือสิได้เงินมาซ่อมโบสถ์ซ่อมสิม บ่ต้องมาแผ่ มาบอกบุญจากญาติโยมให้ยากปานนี้ดอก”

ปิดท้ายการจ่มด้วยเพลงลูกทุ่งม่วนๆ เดือนธันวาคมนี่ จากแกรมมี่โกลด์ กันเลย โชคดีปีใหม่เด้อครับ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *