พฤศจิกายน 1, 2017 | 12 views

ลมหนาววอยวอยมาแล้ว

มาแล้วครับลมหนาวปีนี้ เริ่มตั้งแต่สิ้นตุลาคม พอเริ่มเข้าพฤศจิกายนลมหนาวพัดวอยวอยมาใส่ให้หัวใจหนุ่มสาวไร้คู่แบบทิดหมูสั่นสะท้านจนได้ครับ เพราะความกดอากาศเย็นพัดพาดผ่านลงมาจากทางเมืองจีนลงใต้สู่แผ่นดินลาว ภาคเหนือและอีสานของเฮา มื้อที่กำลังเขียนบทความนี่ที่กระท่อมน้อยฮิมมูลของทิดหมูอยู่ที่ 21 องศาเซลเซียสตอนค่อนสิแจ้ง ตอนนี้ใกล้เพลกะประมรณ 24 องศา แล้วยังมีฝนตกรินลงมาปรอยๆ อีก หนาวหัวใจคัก

ลมหนาวมาอากาศเปลี่ยนแปลงก็รักษาสุขภาพกันเด้อครับ สงสารแต่ทางขอนแก่น กาฬสินธุ์ ตามฮิมน้ำชีที่นำบ่ทันลดลงเลย ท่วมกันหลายอยู่ได้ฟังข่าวว่า ลดปริมาณการปล่อยน้ำจากเขื่อนอุบลรัตน์แล้ว น้ำกะคือสิค่อยๆ ลดลงอยู่ตี้เนาะ ทางฮิมมูลบ้านผมมีรายงานว่าลดลงมื้อละ 5 เซนติเมตรอยู่ได๋ล่ะ น่าเห็นใจครับ

เรื่องการจัดน้ำนี่ผมว่า ข้าราชการผู้มีส่วนเกี่ยวข้อง อบจ. อบต. รัฐบาล ควรสิคึดใหม่ เฮ็ดใหม่ ต้องป้องกันปัญหาบ่ให้มันเกิด หรือถ้ามันเกิดกะให้มีผลกระทบต่อประชาชนน้อยที่สุด บ่แม่นนอนก่ายหน้าผากเล่นถ้าให้มันท่วมก่อนแล้วฟ้าวซะแท้ๆ เบิกงบเอาเงินทอนนั่นนา อย่าเฮ็ดจั่งซั้น มันบ่งาม จำได้บ่ล่ะ เบิดเดือนตุลาคม 2560 พากันบีบน้ำตาว่าฮักพ่อ สิตามฮอยพ่อ สิพอเพียง มาเลยมาเตรียมโตสานตามฮอยพ่อ เอาจั่งซี้ (สิบอกให้คันสมองกลวงหลาย กะดาย แม่นกูหมึน)

  • แล้งนี้ให้ระดมเครื่องมือ แรงงาน มาส่อยกันขยายแม่น้ำ ห้วยหนอง ที่ตื้นเขิน ขวางทางน้ำ บรรดาท่อนไม้ เนินทรายกลางน้ำ เอาออกให้มันล่วงเถิงกันได้ง่ายๆ ดินทรายขุดได้เอาไปถมถนนหนทางให้เดินทางได้สะดวก อย่าให้เขาเอากล้วย เอาหัวสิงไค (ตะไคร้) ไปปลูกประจานอีก อายเขา ไผมีอำนาจสั่งการลงไป
  • ถนนหนทางที่ขวางทางน้ำกะให้จัดการสร้างสะพาน ทางลอดของน้ำให้ไหลผ่านได้ไวๆ อย่าสิมาเอาท่อลอดกลมๆ ถ่อฮูมดมาใช้อีก น้ำมายามใด๋ขาดยามนั้น เอาท่อเหลี่ยมใหญ่ๆ มาใช้เพื่อระบายลงแก้มลิงให้ไว พ่อหลวงรัชกาลที่ ๙ เพิ่นบอกกะบ่เคยจำ เลยเอามาบอกซ้ำอีก เข้าใจล่ะบ้อบักทิด
  • ไทบ้านเฮากะคือกัน อย่าสิออนซอนหลายบ้านปูนชั้นเดียวนั่น เป็นจั่งใด๋ล่ะบาดน้ำมาอยู่หลังคากะบ่ได้ เฮ็ดบ้านชั้นเดียวได้แต่ให้มีตะหล่างสูงๆ ให้น้ำมันไหลกายหย่าวไปโลด ยามแล้งกะนอนตะห่างลมโชยๆ ยามน้ำกะอยู่ซั้นเทิงซำบาย มีเรือมีพายเตรียมไว้แหน่ล่ะ

ไปเบิ่งไฮ่เบิ่งนาแหน่เด้อบ่แม่นเข้าขอบเข้าล้มเพราะลมแฮงเบิดละบ้อ ลมแฮงหลายอีหลีครับ เบิ่งข่าวทีวีเพิ่นว่า ปีนี้สิหนาวนาน หนาวกว่าปีก่อนๆ เอ้า ถ้าเบิ่งกันน้อ ทิดหมูบ่ได้ใส่เสื้อกันหนาวมาสองปีแล้ว เอามาซักตากแดดแล้วกะแขวนไว้สื่อๆ มันบ่หนาวพอสิได้ใส่ อยากสิใส่กับเขา มีผ้าพันคอ หมวกงามๆ คือกัน

อากาศทางอื่นเป็นจั่งใด๋กะบอกกล่าวกันแหน่เด้อ พี่น้องเอย

ใส่ความเห็น

อีเมลของคุณจะไม่แสดงให้คนอื่นเห็น ช่องที่ต้องการถูกทำเครื่องหมาย *